अमेरिकाले समुद्रमा रोकिएको इरानको करिब १४ करोड ब्यारेल तेल विश्व बजारमा बिक्री गर्न अस्थायी अनुमति दिएको छ । अमेरिकी अर्थ मन्त्रालयका अनुसार यो कदम तेलको मूल्य नियन्त्रणमा राख्नका लागि चालिएको हो ।
अर्थमन्त्री स्कट बेसन्टले उक्त अनुमति छोटो अवधिका लागि मात्र भएको र नयाँ उत्पादन वा खरिदलाई अनुमति नदिने स्पष्ट पारे । उनले इरानले तेल बिक्रीबाट प्राप्त हुने आर्थिक लाभमा पूर्ण पहुँच पाउन कठिन हुने पनि बताए ।
मध्यपूर्वमा जारी युद्ध र इरानी आक्रमणका कारण ऊर्जा पूर्वाधारमा क्षति पुगेपछि तेल तथा ग्यासको मूल्य तीव्र रूपमा बढेको छ । हाल ब्रेन्ट कच्चा तेलको मूल्य प्रति ब्यारेल करिब ११२ डलर पुगेको छ, जुन शुक्रबार मात्र ३ प्रतिशत र गत वर्षको तुलनामा ५३ प्रतिशतले बढी हो ।
